habaru page ad two

ފާއިތުވެދިޔަ ފަސް އަހަރު ދުވަހުގެ ތެރޭގައި އާސަންދަ ސްކީމްގެ ބޭރުން ބޭސްފަރުވާއަށް ދައުލަތުން ތިން ބިލިއަނަށްވުރެ ގިނަ ރުފިޔާ ހަރަދުކޮށްފައިވާކަން އޮޑިޓާ ޖެނެރަލްގެ އޮފީހުން ހާމަކޮށްފިއެވެ.

އޮޑިޓް އޮފީހުން މިއަދު އާންމުކުރި "ޕާފޯމަންސް އޮޑިޓް ރިޕޯޓް" ގައިވާ ގޮތުން، 2019 އިން 2024 ގެ ނިޔަލަށް ބޭސްފަރުވާގެ އެކި އެހީތަކަށް ޖުމްލަ 3,015,807,625 (ތިން ބިލިއަން ފަނަރަ މިލިއަން) އަށްވުރެ ގިނަ ރުފިޔާ ވަނީ ހޭދަކޮށްފައެވެ. މި ހަރަދުތައް އަހަރަކު އެވްރެޖްކޮށް 28 އިންސައްތައިގެ ރޭޓުން އިތުރުވަމުންދާކަން އޮޑިޓުން ފާހަގަކުރެއެވެ.

ތަފާސްހިސާބުތަކުން ދައްކާ ގޮތުގައި 2024 ވަނަ އަހަރު އެކަނިވެސް އާސަންދައިގެ ބޭރުން 872 މިލިއަން ރުފިޔާ ހަރަދުކޮށްފައިވެއެވެ. މިއީ މުޅި އާސަންދަ ސްކީމަށް އެ އަހަރު ކުރި ހޭދައިގެ 26 އިންސައްތައާ އެއްވަރުގެ އަދަދެކެވެ. އޮޑިޓުން އިންޒާރު ދީފައިވާ ގޮތުގައި، މި ރޭޓުން ޚަރަދު އިތުރުވާނަމަ 2031 ވަނަ އަހަރު އަންނަންވާއިރު އާސަންދަ ސްކީމަށްވުރެ ބޮޑު ހޭދައެއް އޭގެ ބޭރުން ކުރަންޖެހިދާނެއެވެ.

އޮޑިޓް ރިޕޯޓުގައިވާ ގޮތުން އެކި ދާއިރާތަކުން ކުރާ ހޭދަ އިތުރުވަމުންދާ މިންވަރަކީ:

ޚަރަދު ބޮޑުވާން ދިމާވާ މައިގަނޑު ސަބަބުތަކުގެ ގޮތުގައި އޮޑިޓްގައި ފާހަގަކޮށްފައިވަނީ އަމިއްލަ ހޮސްޕިޓަލްތަކުގެ އަގުތައް ބޮޑުވުމާއި، އެ އަގުތައް ކޮންޓްރޯލް ކުރަން ސިއްހީ ވުޒާރާއިން އެކަށީގެންވާ މަސައްކަތެއް ކޮށްފައި ނުވުމެވެ. މީގެ އިތުރުން، އެކި އިދާރާތަކުން އެހީ ދިނުމުގައި މަރުކަޒީ ނިޒާމެއް ނެތުމާއި، އިންޓާނަލް ކޮންޓްރޯލްތައް ބަލިކަށިވުމުގެ ސަބަބުން ނިޒާމުގެ ނަހަމަ ބޭނުން ހިފުމަށް މަގުފަހިވެފައިވާ ކަމަށްވެސް ރިޕޯޓުގައި ބުނެފައިވެއެވެ.

ޚާއްސަކޮށް ފާއިތުވި ފަސް އަހަރު އެންސްޕާއިން 1.5 ބިލިއަން ރުފިޔާ ހަރަދުކުރިއިރު، އެހީ ދެމުންދަނީ އިޖްތިމާއީ ރައްކާތެރިކަމުގެ ގާނޫނުގައިވާ ލިމިޓްތަކުގެ ބޭރުންކަން އޮޑިޓުން ފާހަގަކުރިއެވެ. އަދި ސިފައިންނާއި ފުލުހުންގެ ބޭސްފަރުވާއަށް 1.3 ބިލިއަން ރުފިޔާ ހޭދަކޮށްފައިވާކަން ވެސް ރިޕޯޓުން އެނގެއެވެ.

މި ބޮޑު ހޭދަ ކޮންޓްރޯލް ކުރުމަށްޓަކައި އޮޑިޓާ ޖެނެރަލްގެ އޮފީހުން ވަނީ ސަރުކާރަށް މުހިންމު ލަފާތަކެއް ދީފައެވެ. އޭގެ ތެރޭގައި ސިއްހީ ހިދުމަތްތަކުގެ އަގު ކޮންޓްރޯލް ކުރެވޭނެ ގާނޫނީ އޮނިގަނޑެއް އެކުލަވައިލުމާއި، ސިފައިންނާއި ފުލުހުންގެ ބޭސްފަރުވާގެ ސްކީމްތައް މުރާޖައާކޮށް ދެމެހެއްޓެނިވި ސިޔާސަތެއް އެކުލަވައިލުން ހިމެނެއެވެ. އަދި ހަގީގަތުގައިވެސް އެހީއަށް ބޭނުންވާ ފަރާތްތަކަށް އަމާޒުކޮށްގެން 'ޓާގެޓެޑް ސަބްސިޑީ' ތައާރަފުކުރުމަށްވެސް ވަނީ ލަފާދީފައެވެ.

އޮޑިޓް އޮފީހުން ބުނީ، މި ބަދަލުތައް ނުގެނެސް ދައުލަތުގެ ބޭސްފަރުވާގެ ޚަރަދުތައް ދެމެހެއްޓެނިވި ގޮތެއްގައި މެނޭޖް ނުކުރެވޭނެ ކަމަށެވެ.

އާސަންދަ ސްކީމްގެ ބޭރުން ބޭސްފަރުވާއަށް ފަސް އަހަރުތެރޭ ތިން ބިލިއަން ރުފިޔާ ހަރަދުކޮށްފި

އިންޑޮނޭޝިއާގެ ދެކުނު ސުލާވެސީ ޕްރޮވިންސްގައި ހިނގި މަތިންދާބޯޓު ވެއްޓުމުގެ ހިތާމަވެރި ހާދިސާއާ ގުޅިގެން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، އެޤައުމުގެ ރައީސް ޕްރަބޯވޯ ސުބިއަންތޯއަށް ތަޢުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، މި ހާދިސާގެ ސަބަބުން ލިބިވަޑައިގެންނެވި ކުއްލި ސިހުމާއި ފުން ހިތާމަ ފާޅުކުރެއްވިއެވެ. މި ހާދިސާގައި 8 ކުރޫއިންނާއި، އިންޑޮނޭޝިއާގެ މިނިސްޓްރީ އޮފް މެރީން އެފެއާޒް އެންޑް ފިޝަރީޒްގެ 3 އޮފިޝަލުން ހިމެނޭހެން ޖުމްލަ 11 މީހުންގެ ފުރާނަ ވަނީ ގެއްލިފައެވެ.

ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ފޮނުއްވި މި މެސެޖުގައި، އިންޑޮނޭޝިއާގެ ރައީސް ސުބިއަންތޯއަށާއި، އެޤައުމުގެ ސަރުކާރަށާއި ރައްޔިތުންނަށް ވަނީ ތަޢުޒިޔާ ދަންނަވާފައެވެ. ވަކިން ޚާއްޞަކޮށް، މި ހާދިސާގައި ފުރާނަ ގެއްލިދިޔަ ފަރާތްތަކުގެ އާއިލާތަކަށް ކުރިމަތިވެފައިވާ ހިތްދަތި ދަނޑިވަޅުގައި، އެ އާއިލާތަކަށް ކެތްތެރިކަން ދެއްވުމަށް އެދިވަޑައިގެން ހަމްދަރުދީ ފޮނުއްވާފައިވެއެވެ.

މީގެ އިތުރުން، މި ހާދިސާ ހިނގި ސަރަޙައްދުގައި މީހުން ހޯދުމާއި ސަލާމަތްކުރުމަށް މިހާރު ކުރިއަށްދާ އޮޕަރޭޝަން، ކާމިޔާބުކަމާއެކު ނިންމާލެވޭނެ ކަމަށް އުންމީދު ކުރައްވާ ކަމުގައިވެސް ރައީސުލްޖުމްހޫރިއްޔާގެ މެސެޖުގައި ވަނީ ވިދާޅުވެފައެވެ.

އިންޑޮނޭޝިއާއަކީ ދިވެހިރާއްޖެއާ ގާތް ގުޅުމެއް ބާއްވާ އިސްލާމީ އަޚުވަންތަ ޤައުމެކެވެ. މިފަދަ ހިތާމަވެރި ދަނޑިވަޅުތަކުގައި ރާއްޖެއިން އަބަދުވެސް އަންނަނީ އެޤައުމާ އެކު އޮތް ގާތްކަން ހާމަކުރަމުންނެވެ.

އިންޑޮނޭޝިއާގައި ހިނގި މަތިންދާބޯޓު ވެއްޓުމުގެ ހާދިސާއާ ގުޅިގެން ރައީސުލްޖުމްހޫރިއްޔާ ތަޢުޒިޔާ ފޮނުއްވައިފި

ރައްޔިތުން އިޚްތިޔާރު ކުރަންވީ ޖަވާބުދާރީ ކުރުވުމުގެ ނަމުގައި ކަންކަމަށް ހުރަސްނާޅާ، ސަރުކާރާ ގުޅިގެން މަސައްކަތް ކުރާނެ ވެރިންތަކެއް ކަމަށް ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސައިން މުޙައްމަދު ލަތީފް ވިދާޅުވެއްޖެއެވެ.

ނައިބު ރައީސް މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބުގައި ޕީއެންސީގެ ފަރާތުން މާލެ ސިޓީގެ މޭޔަރު ކަމަށް ވާދަކުރައްވާ ކެންޑިޑޭޓު މޫސާ އަލީ ޖަލީލުގެ ކެމްޕެއިން އޮފީސް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.

މި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ، މާލެ ސިޓީއަށް ދިމާވެފައިވާ ގިނަގުނަ މައްސަލަތައް ހައްލުކުރުމަށްޓަކައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މަސައްކަތް ކުރައްވާ ބާރުމިނުގައި މަސައްކަތް ކުރެވޭނެ ފަދަ ވެރިންތަކެއް ހޮވުން މުހިންމު ކަމަށެވެ. މާލެ ސިޓީގެ މޭޔަރުކަން ކުރެއްވި ބޭފުޅުންގެ ތެރެއިން ރައީސް މުޢިއްޒަކީ ރައްޔިތުންގެ ބޮޑު ލޯތްބާއި އިޙްތިރާމެއް ހޯއްދަވާފައިވާ ބޭފުޅެއްކަން ފާހަގަކުރައްވައި، އެމަނިކުފާނު މާލެއަށް ތަޞައްވުރު ކުރެއްވި ކަންކަން މެނިފެސްޓޯއާ އެއްގޮތަށް މިހާރުވެސް ކުރިއަށްދާ ކަމަށް ވިދާޅުވިއެވެ.

ނައިބު ރައީސް ޙުސައިން މުޙައްމަދު ލަތީފް ވިދާޅުވީ، ސަރުކާރު ޖަވާބުދާރީ ކުރުވުމުގެ ނަމުގައި ތަރައްޤީގެ މަޝްރޫޢުތަކަށް ހުރަސްއެޅުމުގެ ބަދަލުގައި، ބޭނުންވަނީ އިޚްލާޞްތެރިކަމާއެކު ޚިދުމަތް ކުރާނެ ވެރިން ކަމަށެވެ. އަދި ސަރުކާރު ޖަވާބުދާރީ ކުރުވާނެ ފަރާތްތަކެއް (ރައްޔިތުންގެ މަޖިލިސް) ރައްޔިތުން މިހާރުވެސް އިޚްތިޔާރުކޮށްފައިވާކަން އެމަނިކުފާނު ފާހަގަކުރެއްވިއެވެ.

"އެކަންކަމަށް ކަނޑައަޅުއްވާފައިވާ ފަރާތްތައް އެތިއްބެވީ އެބޭފުޅުންގެ މަންދޫބުންގެ ގޮތުގައި އިޚްތިޔާރު ކުރައްވާފައި. އެހެންކަމުން ސަރުކާރު ޖަވާބުދާރީ ކުރުވާނީ އެދާއިރާތަކުގެ މެންބަރުން، އެ މުޢައްސަސާތަކުން. ކައުންސިލްތަކާއި ސިޓީކައުންސިލްތަކުން ބޭނުންވަނީ ސަރުކާރާ ގުޅިގެން ރައްޔިތުންނަށް ކަންކަން މަގުފަހިކޮށްދޭނެ ވެރިންތަކެއް،" ނައިބު ރައީސް ވިދާޅުވިއެވެ.

މާލެ ސިޓީގެ ތޮއްޖެހުމާއި، ޕާކިންގް މައްސަލަތަކަށް އަލިއަޅުއްވާލައްވަމުން ނައިބު ރައީސް ވިދާޅުވީ، ސަރުކާރުން ރާވާފައިވާ ކަންކަން ތަންފީޛު ކުރުމުގައި މޭޔަރުގެ ދައުރު ބޮޑު ކަމަށެވެ. ނަމަވެސް ވޭތުވެދިޔަ ދެ އަހަރު ދުވަހު އެ އެއްބާރުލުން ލިބިފައިނުވާކަން އެމަނިކުފާނު ހިތާމައާއެކު ފާހަގަކުރެއްވިއެވެ.

ނައިބު ރައީސްގެ ވާހަކަފުޅު ނިންމަވާލެއްވީ، ޕީއެންސީގެ ފަރާތުން ނުކުމެ ތިއްބެވީ ޤައުމުދެކެ ލޯބިވާ އެއް ޓީމެއް ކަމަށާއި، މާލޭގެ ތަރައްޤީއަށްޓަކައި ރައީސް މުޢިއްޒުގެ ތަޞައްވުރު ދަންނަ ލީޑަރުން ހޮވުމަށް ރައްޔިތުންނަށް އިލްތިމާސް ކުރައްވަމުންނެވެ.

ބޭނުންވަނީ ޖަވާބުދާރީ ކުރުވުމުގެ ނަމުގައި ކަންކަމަށް ހުރަސްނާޅާ ވެރިން: ނައިބު ރައީސް

ސަރުކާރުގެ "ބޯހިޔާވަހިކަން އެންމެންނަށް" ސިޔާސަތުގެ ދަށުން ގޯއްޗާއި ފްލެޓަށް އެދި ހުށަހެޅުމުގެ ފުރުޞަތު ހުޅުވާލިތާ އެއް ދުވަސްތެރޭ 500 އަށްވުރެ ގިނަ މީހުން ފޯމު ހުށަހަޅާފައިވާ ކަމަށް އިމާރާތްކުރުމާއި ގެދޮރުވެރިކަމާ ބިނާރާ ބެހޭ ވުޒާރާއިން ހާމަކުރައްވައިފިއެވެ.

ގެދޮރުވެރިކަމާ ބިނާރާ ބެހޭ ވުޒާރާއިން އާންމުކުރި އެންމެ ފަހުގެ ތަފާސްހިސާބުތަކަށް ބަލާއިރު، އިއްޔެ މި ފުރުޞަތު ހުޅުވާލި ފަހުން މިހާތަނަށް ޖުމްލަ 399 މީހަކު ވަނީ ފްލެޓަށް އެދި ފޯމު ހުށަހަޅާފައެވެ. އަދި ގޯއްޗަށް އެދި މިހާތަނަށް 119 މީހަކު ފޯމު ހުށަހަޅާފައިވާ ކަމަށް އެ ވުޒާރާއިން ވިދާޅުވިއެވެ.

މީގެ އިތުރުން، ފޯމު ހުށަހެޅުމުގެ މަރުހަލާގައި ގިނަ އަދަދެއްގެ ބަޔަކު މިހާރުވެސް ހަރަކާތްތެރިވަމުންދާކަން ފާހަގަކުރެވެއެވެ. އެގޮތުން 3,836 މީހުން ޑްރާފްޓް ސްޓޭޖުގައި ފޯމު ފުރިހަމަކުރުމުގެ މަސައްކަތް މިހާރުވެސް ކުރަމުންދާ ކަމަށް އެ ވުޒާރާގެ ތަފާސްހިސާބުތަކުން ދައްކައެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ މި ބިޔަ މަޝްރޫޢުގެ ދަށުން މި ބުރުގައި 15,000 ގޯއްޗާއި 7,900 ފްލެޓަށް ކުރިމަތިލުމުގެ ފުރުޞަތު ވަނީ ހުޅުވާލާފައެވެ. ފޯމު ހުށަހެޅުމުގެ ހުރިހާ ކަމެއްވެސް ކުރިއަށްދަނީ "ހިޔާވެހި" އޮންލައިން ޕޯޓަލް މެދުވެރިކޮށެވެ.

ގެދޮރުވެރިކަމާ ބިނާރާ ބެހޭ ވުޒާރާއިން ބަޔާންކުރައްވާފައިވާ ގޮތުގައި، ފޯމު ހުށަހެޅުމުގެ ކުރިން ޑްރާފްޓް މަރުހަލާގައި އޮންނައިރު ފޯމަށް ބޭނުންވާ އުނިއިތުރު ގެނައުމުގެ ފުރުޞަތު އޮންނާނެއެވެ. ނަމަވެސް، އެއްފަހަރު ފޯމު ހުށަހަޅައި ނިމުމުން އެ ފޯމެއް ކެންސަލެއް ނުކުރެވޭނެއެވެ. އަދި އުސޫލު ހަމަޖެހިފައިވާ ގޮތުން ކޮންމެ މީހަކަށްވެސް ހުށަހެޅޭނީ ފްލެޓް ނުވަތަ ގޯތި، މިއިން ކޮންމެވެސް އެއް ސްކީމަކަށެވެ.

މި ސްކީމުގެ ދަށުން ގޯއްޗަށް އެދި ހުށަހެޅުމުގެ ސުންގަޑިއަކީ އަންނަ މާރިޗު މަހުގެ 4 ވަނަ ދުވަހެވެ. އަދި ފްލެޓަށް އެދި ހުށަހެޅުމުގެ ފުރުޞަތު އޭޕްރީލު މަހުގެ 17 ވަނަ ދުވަހުގެ ނިޔަލަށް ވަނީ ހުޅުވާލާފައެވެ.

މި މަޝްރޫޢާ ގުޅޭ އިތުރު މަޢުލޫމާތާއި، ފޯމު ހުށަހަޅަންޖެހޭ އުސޫލުތަކާއި ޝަރުތުތައް ގެދޮރުވެރިކަމާ ބިނާރާ ބެހޭ ވުޒާރާގެ ސޯޝަލް މީޑިއާ މަންސަތަކުންނާއި ސަރުކާރުގެ ގެޒެޓުން މިހާރު ފެންނަން ހުންނާނެއެވެ. ސަރުކާރުގެ އަމާޒަކީ ދެފުށް ފެންނަ ނިޒާމެއްގެ ތެރެއިން ހުރިހާ ރައްޔިތުންނަށް ބޯހިޔާވަހިކަން ކަށަވަރުކޮށްދިނުމެވެ.

ފްލެޓާއި ގޯއްޗަށް އެދި އެއް ދުވަސްތެރޭ 500 އަށްވުރެ ގިނަ މީހުން ފޯމު ހުށަހަޅައިފި

މުދާ އުފުލާ ބޯޓެއް ބަންޑުން ޖަހާލުމާ ގުޅިގެން، އެ ބޯޓުން ދަތުރުކުރި ދެ މީހަކު ގެއްލިގެން ހޯދުމުގެ މަސައްކަތް އެމްއެންޑީއެފް ކޯސްޓްގާޑުން ފަށައިފިއެވެ.

އެމްއެންޑީއެފުން ވިދާޅުވި ގޮތުގައި، މިއަދު ހެނދުނު 7:27 އެހާއިރު ބަންޑުން ޖަހާލާފައިވަނީ "ބަލްމާ – 6" ނަމަކަށް ކިޔާ މުދާ އުފުލާ ބޯޓެކެވެ. މި ހާދިސާ ހިނގި އިރު ބޯޓުގައި ޖުމްލަ ހަތަރު މީހުން ތިބި ކަމަށާއި، އޭގެ ތެރެއިން ދެ މީހަކު އެ ސަރަހައްދުން ދަތުރުކުރި އެހެން ދޯންޏަކަށް ވަނީ ނަގާފައެވެ. ނަމަވެސް، ބާކީ ތިބި ދެ މީހުން އަދިވެސް ފެނިފައި ނުވާތީ، އެ މީހުން ހޯދުމުގެ މަސައްކަތް ހުއްޓުމެއް ނެތި ކުރިއަށްދާ ކަމަށް އެމްއެންޑީއެފުން މަޢުލޫމާތު ދެއްވައެވެ. ގެއްލިގެން ހޯދަމުންދަނީ ދިވެއްސަކާއި ބިދޭސީއެކެވެ.

މި ހާދިސާ ހިނގާފައިވަނީ ތާޖު އެގްޒޯޓިކާ ރިޒޯޓު ކައިރިއަށެވެ. ބޯޓު ބަންޑުން ޖަހާލި ސަރަހައްދުގައި އެމްއެންޑީއެފް މާލެ އޭރިއާ ކޮމާންޑް ކޯސްޓްގާޑު ސެކަންޑް ސްކޮޑްރަންއާއި ކޯސްޓްގާޑް ޑައިވަރުންގެ ޓީމެއް މިހާރު ދަނީ ހަރަކާތްތެރިވަމުންނެވެ.

ހުޅުމާލެއިން ފުރައިގެން ދޮންމާގާއަށް ދަތުރުކުރި މި ބޯޓު ބަންޑުން ޖަހާލުމާއެކު، ބޯޓުގައި ހުރި ބައެއް ތަކެތި ކަނޑަށް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރުގެ ދަތުރުވެރިން ސަމާލުކަން ދެއްވުމަށް އެމްއެންޑީއެފުން ވަނީ އިލްތިމާސްކުރައްވާފައެވެ. ކޯސްޓްގާޑުން ލަފާކުރާ ގޮތުގައި މި ތަކެތި އޮޔާދަނީ ހުޅަނގު ފަރާތަށެވެ.

ބޯޓެއް ބަންޑުންޖަހާލައި، ދެ މީހަކު ގެއްލިގެން ހޯދަން ފަށައިފި

މަސްޖިދުލް ޔޫސުފުލް ބަރުބަރީ މިސްކިތުގެ މަސައްކަތް ނިންމައި، އަންނަ ރަމަޟާން މަހުގެ ކުރިން އެ މިސްކިތް ހުޅުވާނެ ކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މިކަމާ ގުޅޭގޮތުން ވަޒީރު ސޯޝިއަލް މީޑިއާގައި ކުރެއްވި ޕޯސްޓެއްގައި ވިދާޅުވީ، ބަރުބަރީ މިސްކިތުގެ މަސައްކަތް މިހާރު ވަރަށް ބާރަށް ކުރިއަށްދާ ކަމަށާއި، ވަރަށް އަވަހަށް އެ މަސައްކަތްތައް މުޅިން ނިމޭނެ ކަމަށެވެ. އަދި އަންނަ ރަމަޟާން މަހުގެ ކުރިން މިސްކިތް ހުޅުވައި، މި އަހަރުގެ ރޯދަމަހު އެ ތަނުގައި ނަމާދުކުރަން ފެށޭނެ ކަމުގެ އުފާވެރި ޚަބަރު ވަޒީރު ވަނީ ދެއްވާފައެވެ.

ޖުމްލަ 3 ބުރިއަށް އިމާރާތްކުރާ މި މިސްކިތަކީ އެއްފަހަރާ 1,400 މީހުންނަށް ނަމާދު ކުރެވޭނެ ޖާގަ ތަނަވަސްކޮށްދޭ ގޮތަށް ބިނާކުރާ މިސްކިތެކެވެ. އިސްލާމީ ކަންތައްތަކާ ބެހޭ ވުޒާރާއިން މި މިސްކިތް ބިނާކުރުމަށް އަމިއްލަ ފަރާތަކާ ހަވާލުކޮށް، އެއްބަސްވުމުގައި ސޮއިކޮށްފައިވަނީ މިދިޔަ އަހަރުގެ ޖަނަވަރީ މަހުގެ ތެރޭގައެވެ.

ރާއްޖޭގެ އެކި ކަންކޮޅުތަކުގައި ނަމާދުކުރާނެ ޖާގަ އިތުރުކުރުމަށް ރައީސް ޑރ. މުޙައްމަދު މުޢިއްޒުގެ ސަރުކާރުން ކުރިއަށްގެންދާ މަޝްރޫޢުތަކުގެ ދަށުން، މިއަހަރުގެ ތެރޭގައި ގިނަ މިސްކިތްތަކެއް ހުޅުވުމަށް ވަނީ އަމާޒު ހިފާފައެވެ. ވަޒީރު ވިދާޅުވީ، ރަމަޟާން މަހަށް ތައްޔާރުވުމުގެ ގޮތުން މިހާރުވެސް 15 މިސްކިތެއްގެ މަސައްކަތް ނިންމައި، ހުޅުވުމުގެ ފަހުގެ ތައްޔާރީތައް ވަމުންދާ ކަމަށެވެ.

ކޮންމެ އަހަރަކުވެސް ރަމަޟާން މަހާ ދިމާކޮށް އައު މިސްކިތްތައް ހުޅުވުމާއި، މިސްކިތްތަކުގެ އާބާތުރަ ފިލުވައި މަރާމާތު ކުރުމަކީ ސަރުކާރުން ވަރަށް ޚާއްޞަ އިސްކަމެއް ދީގެން ކުރަމުންދާ މަސައްކަތެކެވެ. މިއަހަރުގެ ރަމަޟާން މަހަށް ތައްޔާރުވުމަށްޓަކައި އިސްލާމީ ކަންތައްތަކާ ބެހޭ ވުޒާރާއިން ދަނީ ރާއްޖޭގެ އެކި ރަށްރަށުގައި ގިނަގުނަ މަސައްކަތްތަކެއް ކުރަމުންނެވެ.

ބަރުބަރީ މިސްކިތް ރޯދައިގެ ކުރިން ހުޅުވަނީ

ރާއްޖެއަށް މަސްތުވާތަކެތި އެތެރެކޮށް، އެތަކެތީގެ ވިޔަފާރިކޮށްގެން ހޯދާ ފައިސާ ލޯންޑާކުރާ ނެޓްވޯކްތައް ހުއްޓުވުމަށް ދިވެހި ފުލުހުންގެ ޚިދުމަތުން ކުރިއަށްގެންދާ 'އޮޕަރޭޝަން އަލިމަގު' ގެ ދަށުން މާލޭ ސަރަހައްދާއި ގއ. އަތޮޅުގައި ޚާއްޞަ ހަރަކާތްތަކެއް މިއަދު ހެނދުނު ފަށައިފިއެވެ.

ދިވެހި ފުލުހުންގެ ޚިދުމަތުން ހާމަކުރެއްވި ގޮތުގައި، މިއަދު ހެނދުނު ފެށި މި އޮޕަރޭޝަނަކީ ގއ. އަތޮޅުގައި ފުޅާ ދާއިރާއެއްގައި މަސްތުވާތަކެތީގެ ވިޔަފާރިކޮށް، މަނީ ލޯންޑަރިންގެ އަމަލުތައް ހިންގާކަމަށް ތުހުމަތު ކުރެވޭ ފަރާތްތަކަށް އަމާޒުކޮށްގެން ހިންގާ ހަރަކާތްތަކެކެވެ. މި އޮޕަރޭޝަންގެ މަޤްސަދަކީ މިފަދަ ނެޓްވޯކްތައް ހުއްޓުވައި، ގާނޫނީ ފިޔަވަޅުތައް އެޅުމެވެ.

މި އޮޕަރޭޝަންގެ ތެރެއިން ތުހުމަތުކުރެވޭ ފަރާތްތަކާއި ގުޅުންހުރި ތަންތަން ބަލައި ފާސްކުރުމުގެ މަސައްކަތް މިހާރު ދަނީ ކުރަމުންނެވެ. އަދި ގާނޫނު ތަންފީޒުކުރުމުގެ ގޮތުން އަޅަންޖެހޭ ހުރިހާ ފިޔަވަޅުތަކެއްގެ އަމަލީ މަސައްކަތްތައް ކުރިއަށްދާނެ ކަމަށްވެސް ފުލުހުން ވިދާޅުވިއެވެ.

މި މުހިންމު މަސައްކަތް ކުރިއަށްގެންދަނީ ސައުތު ޕޮލިސްގެ ޚާއްސަ ޓީމްތަކާއި، ފުލުހުންގެ އިންޓެލިޖެންސާއި، ޑްރަގް އެންފޯސްމެންޓް ޓީމުތައް ގުޅިގެންނެވެ.

'އޮޕަރޭޝަން އަލިމަގު' އަކީ މަސްތުވާތަކެތީގެ ވަބާއިން މުޖުތަމަޢު ސަލާމަތްކުރުމަށް ސިލްސިލާކޮށް ކުރިއަށްގެންދާ އޮޕަރޭޝަނެކެވެ. މި އޮޕަރޭޝަން މިހާތަނަށް ރާއްޖޭގެ 39 ރަށެއްގައި ހިންގާފައިވާކަން ފާހަގަކުރެވެއެވެ. މަސްތުވާތަކެތި އަތުލައިގަނެ، މި ނުރައްކަލުން ގައުމު ސަލާމަތްކުރުމަށް ސަރުކާރުގެ ކަމާބެހޭ ހުރިހާ އިދާރާތަކާއި ތަންފީޒީ އިދާރާތައް ގުޅިގެން ދަނީ ގިނަގުނަ މަސައްކަތްތަކެއް ކުރަމުންނެވެ.

މަސްތުވާތަކެތީގެ މައްސަލަތަކުގައި އަތުލައިގަންނަ ތަކެތީގެ އަދަދު އިތުރުވަމުންދާއިރު، ކޯޓު މަރުޙަލާގައި ފިޔަވަޅު އެޅުމުގައި ގިނަ ގޮންޖެހުންތަކެއް ހުރިކަން ފުލުހުން ފާހަގަކުރެއެވެ. މި ގޮންޖެހުންތަކަށް ހައްލެއް ހޯދުމަށްޓަކައި ކަމާގުޅޭ ހުރިހާ ފަރާތްތަކާއެކު މިހާރު ދަނީ މަޝްވަރާކުރެވެމުންނެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސްތުވާތަކެއްޗާ ދެކޮޅަށް ކުރާ މަސައްކަތްތައް ވަނީ އިތުރަށް ވަރުގަދަކޮށްފައެވެ.

އޮޕަރޭޝަން އަލިމަގު: މާލެއާއި ގއ.އަތޮޅުގައި ޚާއްޞަ އޮޕަރޭޝަންތަކެއް!

ކުރިއަށް އޮތް ބަރަކާތްތެރި ރަމަޟާން މަހާ ދިމާކޮށް، ބޭންކް އޮފް މޯލްޑިވްސް (ބީއެމްއެލް) އިން އަގުހުރި އިނާމުތަކެއް ލިބޭ ޚާއްޞަ ޕްރޮމޯޝަނެއް ކަމަށްވާ 'ރަން ފުރުޞަތު 2026' މިއަދު އިފްތިތާޙްކޮށްފިއެވެ.

މި މަހުގެ 10 ވަނަ ދުވަހުން ފެށިގެން އަންނަ މާރޗް މަހުގެ 16 ވަނަ ދުވަހުގެ ނިޔަލަށް ކުރިއަށްދާ މި ޕްރޮމޯޝަނަކީ، ބީއެމްއެލްގެ ކަސްޓަމަރުންނަށް ރޯދަ މަހުގެ ވިޔަފާރިތަކާއެކު ބޮޑެތި އިނާމުތަކެއް ހޯދުމުގެ ފުރުޞަތު ފަހިކޮށްދިނުމުގެ ގޮތުން ފެށި ޕްރޮމޯޝަނެކެވެ. މި މުއްދަތުގެ ތެރޭގައި ޕްރޮމޯޝަނުގައި ބައިވެރިވާ ފިހާރަތަކުން ވިޔަފާރިކުރާ ފަރާތްތަކަށް ކޮންމެ ހަފްތާއަކު ހޮވޭ އިނާމުތަކުގެ އިތުރުން، ޕްރޮމޯޝަން ނިމުމުން ހޮވާ ބޮޑު އިނާމު ހޯދުމުގެ ފުރުޞަތު ލިބިގެންދާނެއެވެ.

ބީއެމްއެލްއިން މަޢުލޫމާތު ދޭ ގޮތުގައި، މި ޕްރޮމޯޝަނުގައި ބައިވެރި ކުރެވޭނީ ބޭންކުގެ އިލެކްޓްރޯނިކް ވަޞީލަތްތައް ބޭނުންކޮށްގެން ކުރާ މުއާމަލާތްތަކެވެ. މީގެ ތެރޭގައި ބީއެމްއެލް ކާޑު މެޝިން (POS)، ސްޓެޓިކް ކިއުއާރު (Static QR) ނުވަތަ ބީއެމްއެލް ޕޭމަންޓް ގޭޓްވޭ މެދުވެރިކޮށް ކުރާ މުއާމަލާތްތައް ހިމެނެއެވެ.

ކޮންމެ ހަފްތާއަކު ކުރިއަށްދާ ގުރުއަތުލުމުގައި، ޕްރޮމޯޝަނުގައި ބައިވެރިވާ ފިހާރަތަކުން ހަފްތާއަކު މަދުވެގެން 500 ރުފިޔާގެ ވިޔަފާރިކުރާ ފަރާތްތަކުގެ ތެރެއިން 5 ނަސީބުވެރިއަކު ހޮވުމަށް ވަނީ ހަމަޖެހިފައެވެ. މިގޮތުން ހޮވޭ ކޮންމެ ނަސީބުވެރިއަކަށް 2,000 ރުފިޔާގެ ގިފްޓް ކާޑެއް ލިބޭނެއެވެ.

މި ޕްރޮމޯޝަނުގެ އެންމެ ޚާއްޞަ އިނާމަކީ ޕްރޮމޯޝަން ނިމުމުން ހޮވޭ ނަސީބުވެރިޔާއަށް ދިނުމަށް ހަމަޖެހިފައިވާ 100,000 ރުފިޔާގެ ގިފްޓް ކާޑެވެ. މި ބޮޑު އިނާމުގެ ގުރުއަތުގައި ބައިވެރިވެވޭނީ ޕްރޮމޯޝަންގެ މުއްދަތުގެ ތެރޭގައި ޖުމްލަ 10,000 ރުފިޔާއަށްވުރެ ގިނައިން ވިޔަފާރިކުރާ ކަސްޓަމަރުންނަށް ކަމަށް ބީއެމްއެލްއިން ވިދާޅުވިއެވެ.

ބީއެމްއެލްއިން އަބަދުވެސް މަސައްކަތް ކުރަމުންދަނީ ރޯދަ މަސް ފަދަ ޚާއްޞަ މުނާސަބަތުތަކާ ގުޅުވައިގެން ކަސްޓަމަރުންނަށް ފައިދާހުރި އަދި ޝައުގުވެރި ޕްރޮމޯޝަންތައް ކުރިއަށް ގެންދިއުމަށެވެ. މި ޕްރޮމޯޝަނުގެ ސަބަބުން ޑިޖިޓަލް ޕޭމަންޓްތަކަށް އިތުރު ހިތްވަރެއް ލިބި، ކަސްޓަމަރުންނަށް އަގުހުރި އިނާމުތަކެއް ހޯދުމުގެ މަގު ތަނަވަސްވެގެންދާނެއެވެ.

ބީއެމްއެލްއިން ރޯދައަށް ޚާއްޞަ 'ރަން ފުރުޞަތު' ޕްރޮމޯޝަން ފަށައިފި

ބައިނަލްއަޤްވާމީ ނިޒާމުގެ ތެރެއިން ކުދި ޤައުމުތަކުގެ މިނިވަންކަމާއި ސިޔާދަތު ރައްކާތެރިކުރުމަކީ އިންތިހާއަށް މުހިންމު ކަމެއް ކަމަށް ދިވެހިރާއްޖޭގެ ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވެއްޖެއެވެ.

ޚާރިޖީ ވަޒީރު މިހެން ވިދާޅުވީ، ސޯމާލީލޭންޑަކީ ވަކި ދައުލަތެއްގެ ގޮތުގައި ބަލައިގަތުމަށް އިސްރާއީލުން ނިންމި ނިންމުމާ ގުޅިގެން މަޝްވަރާކުރުމަށް ސައުދީ އަރަބިއްޔާގެ ޖިއްދާގައި މިއަދު ބޭއްވި އޯގަނައިޒޭޝަން އޮފް އިސްލާމިކް ކޯޕަރޭޝަން (އޯ.އައި.ސީ) ގެ ޚާރިޖީ ވަޒީރުންގެ 22 ވަނަ އެކްސްޓްރާއޯޑިނަރީ ބައްދަލުވުމުގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.

މި ބައްދަލުވުމުގައި ތަޤްރީރު ކުރައްވަމުން ޑރ. ޚަލީލް ވިދާޅުވީ، އިސްރާއީލުގެ މި ނިންމުމަކީ ސޯމާލިއާގެ މިނިވަންކަމާއި ސިޔާދަތަށް އުނިކަންލިބޭ، ބައިނަލްއަޤްވާމީ އުސޫލުތަކާ ކަނޑައެޅިގެން ޚިލާފު އަމަލެއް ކަމަށެވެ. އަދި އިސްރާއީލުގެ މިފަދަ ނިންމުންތަކާމެދު ދިވެހި ސަރުކާރުން ނުހަނު ކަންބޮޑުވާކަން ފާހަގަކުރައްވައި، މިއީ އދ. ގެ ޗާޓަރާވެސް ފުށުއަރާ ކަމެއްކަމަށް ވަޒީރު ވިދާޅުވިއެވެ.

މީގެއިތުރުން، މެދުއިރުމަތީގެ މަސްރަޙަށް އަލިއަޅުއްވާލައްވަމުން ޚާރިޖީ ވަޒީރު ވިދާޅުވީ، ފަލަސްތީނުގެ ބިންތަކުގައި އިސްރާއީލުން ހިންގަމުންދާ އަނިޔާވެރި އަމަލުތައް އިތުރުވެފައިވާ މި ދަނޑިވަޅުގައި، ބައިނަލްއަޤްވާމީ ޤާނޫނަށް އެ ޤައުމުން އިޙްތިރާމް ނުކުރާކަމީ ބޮޑު ކަންބޮޑުވުމެއް ކަމަށެވެ. ޚާއްސަކޮށް ޣައްޒާގައި ހަނގުރާމަ ހުއްޓާލުމަށް ބައިނަލްއަޤްވާމީ މުޖުތަމަޢުއިން ގޮވާލަމުންދާ ވަގުތެއްގައި، އިސްރާއީލުން ބައިނަލްއަޤްވާމީ ޤާނޫނާ ޚިލާފުވަމުންދާތީ އެކަން ވަޒީރު ވަނީ ހަރުކަށި އިބާރާތުން ކުށްވެރިކުރައްވާފައެވެ.

ވަޒީރު އިތުރަށް ފާހަގަކުރެއްވި ގޮތުގައި، ބައިނަލްއަޤްވާމީ ޤާނޫނީ ނިޒާމު ބަލިކަށިވުމަކީ ދިވެހިރާއްޖެ ފަދަ ބައިނަލްއަޤްވާމީ އުސޫލުތަކަށް ބަރޯސާވާ ކުދި ޤައުމުތަކުގެ ސަލާމަތާއި ރައްކާތެރިކަމަށް އޮތް ބޮޑު ނުރައްކަލެކެވެ.

އޯ.އައި.ސީ އަކީ 57 ޤައުމުގެ މައްޗަށް އެކުލެވިގެންވާ، މުސްލިމު އުއްމަތަށް ދިމާވާ ގޮންޖެހުންތައް ހައްލުކުރުމަށާއި ފަލަސްތީނުގެ ހައްޤުގައި ވަކާލާތުކުރާ އެންމެ ބޮޑު ޖަމުޢިއްޔާއެވެ. ދިވެހިރާއްޖެއިން 1976 ވަނަ އަހަރު މި ޖަމުޢިއްޔާގެ މެމްބަރަކަށް ވީީއްސުރެ، ރާއްޖެއިން ދަނީ މި ޖަމުޢިއްޔާގެ ހަރަކާތްތަކުގައި އިސް ދައުރެއް އަދާކުރަމުންނެވެ.

ކުދި ޤައުމުތަކުގެ ސިޔާދަތު ރައްކާތެރިކުރަން ރާއްޖެއިން ގޮވާލައިފި

މި ހިނގާ 2024 ވަނަ އަހަރުގެ ތެރޭގައި ރާއްޖޭގެ ފަތުރުވެރިކަމުގެ ސިނާއަތަށް އިތުރު ކުރިއެރުންތަކެއް ލިބި، އަލަށް 7 ރިސޯޓެއް ހުޅުވޭނެ ކަމަށް ފަތުރުވެރިކަމާއި ތިމާވެއްޓާ ބެހޭ ވުޒާރާއިން ހާމަކުރައްވައިފިއެވެ.

ފަތުރުވެރިކަމާ ބެހޭ ވުޒާރާއިން ވިދާޅުވި ގޮތުގައި، އަލަށް ހުޅުވޭ މި ރިސޯޓުތަކާއެކު ރާއްޖޭގެ ފަތުރުވެރިކަމުގެ އެނދުގެ އަދަދަށް ބޮޑު ކުރިއެރުމެއް އަންނާނެއެވެ. މިއަހަރު ހުޅުވުމަށް ހަމަޖެހިފައިވާ ރިސޯޓުތަކުގެ ތެރޭގައި ދުނިޔޭގެ މަޝްހޫރު ބްރޭންޑުތައް ހިމެނެއެވެ. އޭގެ ތެރޭގައި ރ. ރަންފުށީގައި ހުޅުވާ ބުލްގާރީ ބްރޭންޑުގެ ރިސޯޓާއި، ސިކްސް ސެންސަސް ކަނުހުރާ (ރަށްގިރި) އަދި ދިންމާގާ މޯލްޑިވްސް ފާހަގަކޮށްލެވެއެވެ.

މިދިޔަ އަހަރަކީވެސް ރާއްޖޭގެ ފަތުރުވެރިކަމަށް ކާމިޔާބު އަހަރެކެވެ. އެގޮތުން މިދިޔަ އަހަރު 6 ރިސޯޓެއް އަލަށް ހުޅުވާފައިވެއެވެ. އޭގެ ތެރޭގައި ކ. ބޮލިދުއްފަރުގައި ހުޅުވި މަންޑަރިން އޮރިއެންޓަލް މޯލްޑިވްސްއާއި، ހއ. މަކުނުދޫ ފަޅުގައި ހުޅުވި ސޮނޭވާ ސީކްރެޓް އަދި ބ. އަތޮޅުގެ ނިއުހީ އެޓް ދިގުފަރު ހިމެނެއެވެ. މީގެ އިތުރުން މާލޭގައި ހުޅުވި ފަސް ތަރީގެ ރަލް ރީފް ރިސޯޓު ބައި ބާސެލޯއާއި، ރިއު ޕެލަސް ރިސޯޓުވެސް ހިމެނެއެވެ.

ވުޒާރާގެ އެންމެފަހުގެ ތަފާސްހިސާބުތަކަށް ބަލާއިރު، މިދިޔަ އަހަރު ނިމުނުއިރު ރާއްޖޭގައި ހިންގާ ރިސޯޓުތަކުގެ ޖުމްލަ އަދަދަކީ 178 އެވެ. މިއާއެކު ރިސޯޓުތަކުގައި ހުރި ޖުމްލަ އެނދުގެ އަދަދު ވަނީ 44,697 އަށް އިތުރުވެފައެވެ. ރާއްޖޭގެ އެންމެ ގިނަ އެނދު ހުރީ މާލެ އަތޮޅުގައެވެ. އެއީ 13,500 އަށްވުރެ ގިނަ އެނދާއެކު މުޅި ރާއްޖޭގެ އެނދުގެ 31 އިންސައްތައެވެ. ދެވަނައަށް އެންމެ އެނދު ގިނަ އދ. އަތޮޅުގައި 5,800 އަށްވުރެ ގިނަ އެނދު (13 އިންސައްތަ) ހުރިކަން ފާހަގަކުރެވެއެވެ.

ފަތުރުވެރިން ޒިޔާރަތްކުރި އަދަދަށް ބަލާއިރު، މިދިޔަ އަހަރު ރާއްޖެއަށް 2,240,000 އަށްވުރެ ގިނަ ފަތުރުވެރިން ޒިޔާރަތްކޮށްފައިވެއެވެ. މިއީ އޭގެ ކުރީ އަހަރާ އަޅާބަލާއިރު 200,000 ފަތުރުވެރިންގެ އިތުރުވުމެކެވެ. މީގެ އިތުރުން، މިދިޔަ އަހަރު ޒިޔާރަތްކުރި ފަތުރުވެރިން ވަނީ ރެކޯޑު އަދަދަކަށް ފައިސާ ހޭދަކޮށްފައެވެ. އެގޮތުން 5.4 ބިލިޔަން އެމެރިކާ ޑޮލަރު ފަތުރުވެރިން ހޭދަކޮށްފައިވާއިރު، މިއީ އޭގެ ކުރީ އަހަރާ އަޅާބަލާއިރު 15.8 އިންސައްތައިގެ ކުރިއެރުމެކެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އަމާޒު ހިފާފައިވަނީ ރާއްޖޭގެ ފަތުރުވެރިކަން އިތުރަށް ފުޅާކޮށް، އިގްތިސާދީ ގޮތުން ރާއްޖެއަށް ލިބޭ ނަފާ އިތުރުކުރުމަށެވެ. މިއަހަރު ހުޅުވޭ އައު ރިސޯޓުތަކާއެކު މި އަމާޒަށް ވާސިލްވުމަށް ބޮޑު ބާރަކަށް ވެގެންދާނެއެވެ.

ރާއްޖޭގައި އިތުރު 7 ރިސޯޓު ހުޅުވަނީ

އިންތިޚާބުތަކުގައި މަސައްކަތްކުރާ އޮފިޝަލުން ތަމްރީންކުރުމަކީ ރައްޔިތުންނާއި ކެނޑިޑޭޓުންގެ އިންތިޚާބީ ހައްޤުތައް ކަށަވަރުކުރުމަށްޓަކައި ކުރަންޖެހޭ އެންމެ މުހިންމު އެއް މަސައްކަތް ކަމަށް އިލެކްޝަންސް ކޮމިޝަނުގެ ނައިބު ރައީސް ޢަބްދުއްރަޙްމާން ޞަލާޙު ރަޝީދު ވިދާޅުވެއްޖެއެވެ.

އޭނާ މިހެން ވިދާޅުވީ ކުރިއަށް އޮތް ލޯކަލް ކައުންސިލް އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބަށް އޮފިޝަލުން ތަމްރީނުކުރާނެ "ޓްރެއިނަރުން" ބިނާކުރުމަށް ބޭއްވި ޕްރޮގްރާމް ނިންމުމުގެ ރަސްމިއްޔާތުގައެވެ. ސީއެޗްއެސްސީގައި މި މަހުގެ 3 އިން 9 އަށް ކުރިއަށް ގެންދިޔަ މި ތަމްރީނު ޕްރޮގްރާމުގައި 100 އަށްވުރެ ގިނަ ޓްރެއިނަރުން ވަނީ ތަމްރީނު ފުރިހަމަކޮށްފައެވެ.

މި ރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުން ނައިބު ރައީސް ޞަލާޙު ވިދާޅުވީ، މި ތަމްރީނުތަކުގެ ސަބަބުން އިންތިޚާބުގެ ކަންކަން އިތުރަށް ހަރުދަނާވެ، އޮފިޝަލުންނަށް ބޭނުންވާ ފަންނީ މަޢުލޫމާތު ފުރިހަމައަށް ފޯރުކޮށްދެވޭނެ ކަމަށެވެ. އަދި މިއީ ކެނޑިޑޭޓުންނާއި ވޯޓުލާ ފަރާތްތަކުގެ ޙައްޤުތައް ހިމާޔަތްކުރުމަށް އެޅޭ މުހިންމު ފިޔަވަޅެއްކަން އޭނާ ފާހަގަކުރެއްވިއެވެ.

"މައުލޫމާތު ރަނގަޅަށް ފޯރުކޮށްދެވިއްޖެނަމަ ރައްޔިތުންގެ އަދި ކެނޑިޑޭޓުންގެ ހައްގުތަކަށް އަރައިނުގަނެ މަސައްކަތްކުރެވޭނެ. ބައެއް ފަހަރު މީޑިއާތަކުގައި މަޢުލޫމާތު ފޯރުކޮށްދިނުމުގައި މާނަ އޮޅޭގޮތަށް ކަންކަން ހިނގާފައިވާތީ، އެކަމަށް ސަމާލުވާންޖެހޭ،" ޞަލާޙު ވިދާޅުވިއެވެ.

ލޯކަލް ކައުންސިލް އިންތިޚާބަކީ މަސައްކަތުގެ ގޮތުން އެންމެ ބުރަ އަދި އެންމެ ގިނަ ވަގުތު ހޭދަވާނެ އިންތިޚާބުކަން ފާހަގަކުރައްވަމުން ޞަލާޙު ވިދާޅުވީ، ގާތްގަނޑަކަށް 3 ލައްކައެއްހާ މީހުންނަށް ވޯޓުލުމުގެ ޙައްޤު ލިބިފައިވާއިރު، ކޮންމެ މީހަކަށް ގިނަ އަދަދެއްގެ ވޯޓު ކަރުދާސް ދޫކުރަންޖެހޭނެ ކަމަށެވެ. އެހެންކަމުން ވޯޓު ސައްހަވާނެ ގޮތްތަކާއި ފާހަގަޖަހާނެ ގޮތުގެ އިރުޝާދު ދިނުމުގައި ޓްރެއިނަރުންގެ ދައުރު ބޮޑުކަމަށް އޭނާ ވިދާޅުވިއެވެ.

މި ޕްރޮގްރާމް ނިންމި ޓްރެއިނަރުން ދެން ހަރަކާތްތެރިވާނީ ރާއްޖެއާއި ރާއްޖެއިން ބޭރުގެ ވޯޓުލާ މަރުކަޒުތަކުގައި މަސައްކަތްކުރާނެ އޮފިޝަލުން ތަމްރީނު ކުރުމުގައެވެ. އެގޮތުން، އިންތިޚާބަށް ބޭނުންވާ 7,000 އޮފިޝަލުން ތަމްރީނު ކުރުމުގެ މަސައްކަތް މި މަހުގެ 11 ވަނަ ދުވަހު އަތޮޅުތެރޭގައި ފެށުމަށް ވަނީ ހަމަޖެހިފައެވެ. އަދި މާލޭ ސަރަހައްދުގެ އޮފިޝަލުން ތަމްރީނު ކުރުން މި މަހުގެ 15 ގައި ފެށުމަށް އިލެކްޝަންސް ކޮމިޝަނުން ވަނީ ތާވަލުކޮށްފައެވެ.

މި ތަމްރީނުތަކުގައި ވޯޓުލާ ދުވަހުގެ އިޖުރާއަތްތަކާއި، މަރުކަޒުތަކުގެ އިންތިޒާމުތައް ބަލަހައްޓާނެ ގޮތުގެ ތަފްސީލީ މަޢުލޫމާތު އޮފިޝަލުންނަށް ފޯރުކޮށްދެވޭނެއެވެ.

އިންތިޚާބީ ޙައްޤުތައް ކަށަވަރުކުރަން އޮފިޝަލުން ތަމްރީންކުރުން މުހިންމު

ސްކޫލް ބަންދާ ދިމާކޮށް ކުލަބު ވެލެންސިއާ އެކެޑަމީގެ ފަރާތުން އިންތިޒާމުކޮށްގެން ކުރިއަށްގެންދާ "ސޮކާ ކޭމްޕް" އަށް ބޮޑު ތަރުހީބެއް ލިބެމުންދާކަން އެ ކުލަބުން ހާމަކޮށްފިއެވެ.

މި މަހުގެ 4 އިން 6 އަށް ހުޅުމާލޭގައި ކުރިއަށްގެންދާ މި ކޭމްޕަކީ 60 ވަރަކަށް ކުދިންނާއެކު ފެށި ކޭމްޕެކެވެ. ވެލެންސިއާ އެކެޑަމީން ބުނި ގޮތުގައި މިފަދަ ކޭމްޕެއް ބޭއްވުމުގެ މައިގަނޑު މަގްސަދަކީ ސްކޫލު ބަންދާ ދިމާކޮށް އެކެޑަމީތަކުގެ ގަވާއިދުން ބާއްވާ ތަމްރީނުތައް މަޑުޖައްސާލާފައިވާ ވަގުތެއްގައި، ފުޓުބޯޅަ ކުޅެން ބޭނުންވާ ކުދިންނަށް ބަންދު ތެރޭގައިވެސް އެ ފުރުސަތު ފަހިކޮށްދިނުމެވެ.

މި ކޭމްޕު ކުރިއަށްދަނީ ހަމައެކަނި ފުޓުބޯޅައިގެ ތަމްރީނުތަކަށް އެކަނި ބަލައިގެންނެއް ނޫނެވެ. ކުދިންގެ ހުނަރު ތަރައްގީކުރުމަށް ތަފާތު އެކި ހަރަކާތްތައް ވަނީ ހިމަނާފައެވެ. އޭގެ ތެރޭގައި މޫދުގައި ހިންގާ ހަރަކާތްތަކާއި، ޓްރެކްގައި ކުރިއަށްގެންދާ ހަރަކާތްތައް ހިމެނެއެވެ.

މި ކޭމްޕުގެ ހަރަކާތްތައް މުއްސަނދިވެގެންދަނީ ރާއްޖޭގެ ފުޓުބޯޅައިގެ ތަޖުރިބާކާރު ކޯޗުންގެ އިރުޝާދުގެ ދަށުންނެވެ. އެގޮތުން ފަސްޓް ޑިވިޝަނުގެ ކޯޗު މުހައްމަދު ނިޒާމް (ނިޒާމްބެ) އަދި ޕްރޯ ލައިސަންސް ކޯޗު މުހައްމަދު ޝާޒްލީ (ޝާޒް) ފަދަ ފުންނާބު އުސް ކޯޗުން ކުދިންނަށް އިރުޝާދު ދީފައިވާކަން ވެލެންސިއާއިން ފާހަގަކުރެއެވެ.

ވެލެންސިއާ އެކެޑަމީން މައުލޫމާތު ދިން ގޮތުގައި، މި ކޭމްޕުގައި ބައިވެރިވުމަށް ވަރަށް ގިނަ އަދަދެއްގެ ކުދިން އެދިފައިވެއެވެ. ނަމަވެސް ޖާގައިގެ ދަތިކަން ހުރުމުގެ ސަބަބުން މިފަހަރު ފުރުސަތު ދެވުނީ އެންމެ ފުރަތަމަ ކުރިމަތިލީ 60 ވަރަކަށް ކުދިންނަށެވެ.

"މިފަދަ ކޭމްޕުތަކުގެ ސަބަބުން ހުނަރުވެރި ކުޅުންތެރިން ފާހަގަކުރުމަށް ވަރަށް ބޮޑަށް ފަސޭހަވެގެންދޭ. އަދި ކުދިންގެ މެދުގައި އޮންނަ ގުޅުން ބަދަހިވެ، ކުޅިވަރުގެ ރޫހު އާލާވޭ،" ވެލެންސިއާ އެކެޑަމީން ބުންޏެވެ.

ކުލަބު ވެލެންސިއާއިން އިތުރަށް ބުނީ މިފަހަރުގެ ކޭމްޕަށް ލިބުނު ބޮޑު ތަރުހީބަށް ބަލައި، ކުރިއަށް އޮތް ތަނުގައިވެސް މިފަދަ ތަފާތު ހަރަކާތްތަކާއެކު ކޭމްޕުތައް ކުރިއަށް ގެންދިއުމަށް ވިސްނާފައިވާ ކަމަށެވެ.

ވެލެންސިއާ އެކެޑަމީގެ ސޮކާ ކޭމްޕަށް ބޮޑު ތަރުހީބެއް

މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ "ޓެކްނޮލޮޖީ ސޮލިއުޝަންސް ޕްރޮވައިޑާސް" ގެ ގޮތުގައި މަސައްކަތް ކޮށްދޭނެ ފަރާތްތަކެއް ހޯދުމަށް އެ ކުންފުނިން އިޢުލާނުކޮށްފިއެވެ.

"ޓެކްނޮލޮޖީ ސޮލިއުޝަންސް ޕްރޮވައިޑާސް" އަކީ ވިޔަފާރިތަކަށް ކުރިމަތިވާ އެކި ކަހަލަ ގޮންޖެހުންތަކަށް ފަންނީ ހައްލު ހޯދައިދީ، އީޖާދީ އުފެއްދުންތައް މެދުވެރިކޮށް މަސައްކަތްތައް ހަރުދަނާކުރުމަށް އެހީތެރިވެދޭ ކުންފުނިތަކެވެ. މީގެ ތެރޭގައި މައިގަނޑު ގޮތެއްގައި ކްލައުޑް ކޮމްޕިއުޓިން، ސައިބަރ ސެކިއުރިޓީ، އާޓިފިޝަލް އިންޓެލިޖެންސް (އޭއައި)، ސޮފްޓްވެއަރ ޑިވެލޮޕްމަންޓް އަދި ނެޓްވޯކް އިންފްރާސްޓްރަކްޗަރ ފަދަ ދާއިރާތައް ހިމެނެއެވެ.

އެމްއޭސީއެލްއިން ކުރި އިޢުލާނުގައި ވާގޮތުން، މި މަސައްކަތަށް ހޮވޭ ފަރާތްތަކުން އަމަލުކުރަން ޖެހޭނީ އެ ކުންފުނިން އަންގާ ގޮތެއްގެ މަތިންނެވެ. މީގެ ތެރޭގައި ޓެކްނޮލޮޖީއާ ގުޅުންހުރި އެކި ޚިދުމަތްތައް ފަރުމާކުރުމާއި، ބިނާކުރުމުގެ އިތުރުން އެ ޚިދުމަތްތައް ދެމެހެއްޓެނިވި ގޮތެއްގައި ފޯރުކޮށްދީ ބެލެހެއްޓުން ހިމެނެއެވެ.

މި މަސައްކަތަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ ޝަރުތުތަކުގެ ތެރޭގައި، މިނިސްޓްރީ އޮފް އިކޮނޮމިކް ޑިވެލޮޕްމަންޓް އެންޑް ޓްރޭޑްގައި ކުދި އަދި މެދުފަންތީގެ ވިޔަފާރިއެއްގެ ގޮތުގައި ރަޖިސްޓްރީވެފައިވުން ހިމެނެއެވެ. މީގެ އިތުރުން، އެ މަސައްކަތެއް ކުރާ ޓީމުގައި މަދުވެގެން 5 ދިވެހިން ހިމެނެންވާނެ ކަމަށްވެސް އެމްއޭސީއެލްއިން ވަނީ ބުނެފައެވެ.

މި ކަމަށް ޝައުޤުވެރިވާ ފަރާތްތަކުން އީމެއިލް މެދުވެރިކޮށް ޝައުޤުވެރިކަން ފާޅުކުރުމަށް އެ ކުންފުނިން ވަނީ އެދިފައެވެ. ޝައުޤުވެރިކަން ފާޅުކުރާއިރު އެ ފަރާތެއްގެ ފުރިހަމަ ނަމާއި، އެޑްރެސް، އީމެއިލް، ގުޅޭނެ ނަންބަރު އަދި ބޭނުންވާ އެހެނިހެން ލިޔެކިޔުންތައް ހުށަހަޅަންޖެހެއެވެ.

އެމްއޭސީއެލްއިން އިތުރަށް ހާމަކުރި ގޮތުގައި، ޝައުޤުވެރިކަން ފާޅުކުރާ ފަރާތްތަކުގެ ތެރެއިން ޝަރުތު ހަމަވާ ފަރާތްތަކަށް، ކުންފުނިން ބޭނުންވާ ހާލަތްތަކުގައި ކަނޑައެޅިފައިވާ އުސޫލުތަކުގެ ތެރެއިން މަސައްކަތްތައް ހަވާލުކުރަމުންދާނެއެވެ.

ޙަބަރު